Partia qeverisëse e Presidentit turk Tayip Erdogan deklaroi sot se propozoi një projektligj që do të lironte përkohësisht afro 45 mijë të burgosur si përgjigje ndaj rrezikut që koronavirusi mund të përhapet në burg.
Kujtojmë se ka rreth 300,000 të burgosur në burgjet e mbushura me njerëz në Turqi, shkruan Reuters.
Qeveria është duke punuar në reforma për të lehtësuar presionin mbi sistemin, ndërsa grupet për të drejtat e njeriut kanë thënë që infeksionet mund të rriten lehtësisht atje.
Masa vjen pasi numri i rasteve të konfirmuara të virusit në Turqi u rrit në 10.827 të hënën, më pak se tre javë që kur regjistroi rastin e parë, ndërsa deri tani kanë vdekur 168 njerëz.
Të burgosurit që kanë përfunduar gjysmën e dënimeve të tyre do të kenë të drejtë për lirim sipas planit, u tha gazetarëve deputeti i lartë i AKP-së Cahit Ozkan.
Duke përjashtuar ata që janë të dënuar për krime terrorizmi ose droga, vepra të një natyre seksuale dhe vrasje dhe dhunë ndaj grave.
