Pas mbajtjes së kongresit të Partisë për Drejtësi dhe Zhvillim (AK Parti) filloi edhe procesi për krijimin e qeverisë së 65-të.
Sipas procedurës fillimisht Kryeministri Ahmet Davutollu (Ahmet Davutoğlu) shkoi në Pallatin Presidencial dhe i paraqiti letrën e dorëheqjes Presidentit Rexhep Tajip Erdoan (Recep Tayyip Erdoğan).
Mysafiri i radhës në Presidencë ishte Binali Jëlldërëm (Binali Yıldırım), i cili të dielën u zgjodh kryetar i Partisë për Drejtësi dhe Zhvillim (AK Parti).
Në këtë takim Erdoan theksoi se kabineti i ri i qeverisë duhet krijuar sa më shpejt dhe e ngarkoi Jëlldërëm me detyrën e formimit të qeverisë së re.
Binali Jëlldërëm këto ditë do të krijojë kabinetin e rij dhe do t’ia paraqesë për miratim Presidentit Erdoan, pastaj do të fillojë maratona e programit të qeverisë.
Programi i Qeverisë së 65-të fillimisht do të lexohet në seancën plenare të Kuvendit të Madh Popullor të Turqisë dhe pas diskutimeve duhet të marrë votëbesimin e parlamentit.
Ditën e parë të javës e ka nisur me një agjendë të ngjeshur edhe Këshilli Qendror Drejtues Vendimmarrës i rinovuar i AK Partisë (MKYK).
Këshilli (MKYK) sot do të mblidhet nën drejtimin e Kryetarit të ri, Binali Jëlldërëm dhe pritet të përcaktojë përbërjen e Këshillit Qendror Ekzekutiv të partisë.
