Presidenti i SHBA-së, Donald Trump, tha të mërkurën se gjatë bisedës së tij më të fundit me Vladimir Putinin, udhëheqësi rus i kërkoi atij të ndihmonte në zgjidhjen e luftës në Ukrainë.
Trump e bëri deklaratën ndërsa fliste në Forumin Amerikan të Biznesit në Miami, sipas Ukrinform, përcjell Telegrafi.
“Fola me të [Putinin] dy javë më parë dhe ai tha: ‘Ne jemi përpjekur ta zgjidhim këtë luftë për dhjetë vjet, por nuk ishim në gjendje ta bënim. Duhet ta zgjidhësh’”, citohet të ketë thënë Trump.
Ai shtoi se “i zgjidhi disa nga këto gjëra brenda një ore”, pa sqaruar se çfarë donte të thoshte saktësisht.
Në të njëjtën kohë, Trump kritikoi Kombet e Bashkuara për dështimin në ofrimin e ndonjë ndihme në ndërmjetësimin e luftës midis Rusisë dhe Ukrainës, si dhe konflikteve të tjera që, sipas tij, ai ka arritur t’i ndalë që kur mori detyrën.
Trump foli për herë të fundit me Putinin më 16 tetor – një ditë para takimit të Trump me Presidentin ukrainas Volodymyr Zelensky në Shtëpinë e Bardhë.
Ndërkohë, sekretari britanik i Mbrojtjes ka këmbëngulur se Donald Trump është i aftë ta bindë Vladimir Putinin të hyjë në bisedime paqeje për Ukrainën, edhe pse negociatat vazhdojnë të ngecin.
I pyetur nga POLITICO nëse një armëpushim në Ukrainë do të ishte më i vështirë për t’u arritur sesa ai në Gaza, John Healey tha se nuk mund të bëhet një krahasim midis të dyve – me një përjashtim.
“Presidenti Trump është figura që mund ta sjellë Putinin në tryezë, që potencialisht mund t’i japë fund luftimeve”, tha ai, duke folur në një fluturim nga Norvegjia për në Paris, ndërsa udhëtonte për të takuar ministrin e ri francez të mbrojtjes.
Kujtojmë se Trump luajti një rol kyç në ndërmjetësimin e armëpushimit të paqëndrueshëm midis Izraelit dhe Hamasit.
