Tronditet Turqia… I dyshuar për manipulim, kreu i gjyqtarëve përfundon në paraburgim
Kreu i gjyqtarëve të futbollit në Turqi, Ferhat Gündogdu, dhe katër të tjerë janë vendosur në paraburgim në një çështje që ka tronditur të gjithë Federatën Turke të Futbollit (TFF), sipas agjencisë së lajmeve Anadolu.
Gündogdu, kryetar i Komitetit Qendror të Gjyqtarëve (MHK) të TFF-së, dhe gjashtë të tjerë u paraqitën para një gjyqtari të premten në Gjykatën e Qarkut Caglayan në Stamboll për t’u përgjigjur akuzave për manipulim të procesit të menaxhimit të gjyqtarëve. Ata akuzohen, ndër të tjera, për “falsifikim të dokumenteve zyrtare”, “shkelje të besimit” dhe “marrje të paligjshme të të dhënave personale “
Ky është skandali më i fundit që trondit futbollin turk, një vit pasi TFF pezulloi 149 gjyqtarë për baste të paligjshme.
Të enjten në mbrëmje, policia e specializuar në luftimin e basteve të paligjshme dhe krimit sportiv arrestoi gjithashtu Yasin Kol, një gjyqtar në Superligën Turke (Divizioni i Parë), dhe një ndihmës gjyqtar, sipas raportimeve të medias.
Lexo edheErdogan: Turqia po kryen revolucion të plotë në industrinë e mbrojtjes
Dhoma e video-arbitrimit u kontrollua në selinë e TFF-së
Ministri i Drejtësisë Akin Gürlek tha se prokurorët po hetonin “akuzat për ndërhyrje në përcaktimin e renditjes së gjyqtarëve, në emërimet (për ndeshje), në proceset e vlerësimit dhe nominimit, si dhe në testet e njohurive për rregullat”.
Gjatë bastisjeve, policia kontrolloi, ndër të tjera, dhomën e ndihmësit të gjyqtarit video (VAR) në selinë e TFF-së në Stamboll. Sipas vëzhguesve, hetimi lidhet me skandalin e basteve të vitit të kaluar dhe mund të implikojë Federatën.
