Presidenti i Kosovës, Hashim Thaçi e ka përsëritur edhe një herë idenë e tij për korigjim të kufirit mes Kosovës dhe Serbisë, si marrëveshje finale në fazën përfundimtare të dialogut mes Kosovës dhe Serbisë.
Përmes një shkrimi në rrjetin social Twitter, presidenti i Kosovës ka deklaruar se është kundër ndarjes së Kosovës në vija etnike.
Sot, gjatë ditës ka reagur edhe kryetari i Kuvendit Kadri Veseli, i cili ka kundërshtuar idetë e propozuara të Thaçit për ndryshime kufijsh me Serbinë.
“Propozimi im për një zgjidhje paqësore me Serbinë është i qartë: jo ndarjes në vija etnike, por po korigjimit të kufirit dhe njohjes reciproke”, është shprehur Thaçi, në një postim të shkruar në gjuhën angleze, në rrjetin social Twitter.
Deklarata e Thaçit se është i gatshëm që të negociojë me Serbinë korigjimin e kufirit, ka ngjallur reagime në Kosovë. Analistë, intelektualë e politikanë i kanë reaguar Thaçit pas deklaratave të tilla. Madje, për këtë shkak, Thaçi është përfshirë në një debat të hapur me ish-kryeministrin shqiptar Sali Berisha.
