Deputetja e LDK-së Teuta Rugova, ka dalë përsëri kundër qëndrimeve të partisë së cilës i përket.
Ajo i është bashkuar delegacionit të Kuvendit të Kosovës në kryeqytete evropiane, për të lobuar për liberalizim të vizave, shkruan Gazeta Fokus.
Edhe pse shefi i Grupit Parlamentar të LDK-së, Avdullah Hoti, ka deklaruar se partia e LDK-së nuk i bashkohet turit lobues – turistik të Kryetarit të Kuvendit sepse konsideron se liberalizimi i vizave nuk sigurohet përmes veprimeve të tilla.
“Për të kontribuuar në përmbushjen e kritereve për liberalizim të vizave, Kryetari i Kuvendit duhet të sigurojë mbarëvajtjen e punëve të Kuvendit të Kosovës për të aprovuar ligjet që janë të lidhura me MSA-në dhe në mënyrë specifike me Agjendën e Reformave Evropiane. Si kryetar i partisë në koalicion, Kryetari i Kuvendit duhet të kujdeset që Qeveria të përmbushë obligimet karshi agjendës për integrim evropian të Kosovës.
Për informim të opinionit, Grupi Parlamentar i LDK-së nuk ka pranuar asnjë shkresë zyrtare nga Kryetari i Kuvendit lidhur me qëllimet e këtij udhëtimi, agjendë të takimeve dhe detale të tjera të rëndësishme për të planifikuar si duhet këtë vizite zyrtare. Udhëtimet e tilla janë shpenzim i panevojshëm i parasë publike dhe dërgojnë mesazh të paqartë tek shtetet e BE-së”, kishte thënë gjatë ditës së sotme Avdullah Hoti.
Veç kësaj, Teuta Rugova kishte mbështetur qeverinë Haradinaj, duke bërë korumin, ku edhe në këtë rast LDK-ja ishte kundër.
Kurse, vëllai i saj Mendim Rugova, së fundi është emëruar nga Ramush Haradinaj si koordinator për ndryshime klimatike dhe çështje të ambientit./Gazeta Fokus/
