Deputetja e Lidhjes Demokratike të Kosovës, Melihate Tërmkolli nuk ka treguar saktësisht nëse do të votoj pro apo kundër marrëveshjes së Demarkacionit ndërmjet Kosovës dhe Malit të Zi.
Ndonëse shefi i saj, kryeministri Isa Mustafa ka kërkuar nga deputetët e LDK-së të votohet kjo marrëveshje, Tërmkolli thotë se ai s’mund ti përzihet në këtë çështje. Në një prononcim për “Indeksonline”, ajo thotë se votën për Demarkacionin do ta tregojë në seancën e 1 shtatorit.
“A bën me na lënë rehat ne me vendos vet, mediet të na lënë rehat ne me vendos vet. Unë e tregoj në parlament votën time. Mustafa i ka punët e veta, unë jam deputete e ai është shef i partisë dhe unë e di detyrën që e kam. E dini qatë ditë në Parlament me emër të Zotit, keni me ditë shumë mirë”, ka thënë ajo.
Ndryshe, i pari i LDK-së disa herë është diku bërë thirrje që marrëveshja për demarkacion të votohet nga të gjithë deputetët e Kuvendit të Republikës së Kosovës, përfshirë edhe ata të opozitës.
Është në përgjegjësinë e deputetëve që të vendosin, por, sipas Mustafës, nuk ka asnjë “arsye që deputetët të mos e përkrahin Marrëveshjen, duke mundësuar forcimin e sovranitetit të vendit dhe lëvizjen e lirë të qytetarëve të Kosovës në BE”.
