Dy persona janë vënë në hetim të policisë për deklarim të rremë pasi që kishin raportuar se ishin përfshirë në një aksident, ndërsa policia kur doli në vendngjarje konstatoi se ata s’ishin brenda veturës kur ndodhi aksidenti.
Policia tha se deklarimet e rrejshme i bënë me qëllim manipulimin e rrethanave të aksidentit.
“Më 16.07.2025, në kryeqytet është raportuar një aksident trafiku me lëndime trupore. Njësia e trafikut të kryeqytetit menjëherë ka nisë hetim për sqarimin e rrethanave të rastit. Gjatë hetimeve është konstatuar që në momentin e aksidentit personat e dyshuar nuk ndodheshin në veturë dhe deklarimet e tyre ishin të pavërteta e të qëllimshme për të manipuluar rrethanat e aksidentit”, njoftoi policia.
Të dyshuarit janë intervistuar nga policia dhe me udhëzim të prokurorit, ndaj tyre është iniciuar rast penal për veprën “Deklarim i rremë”.
