Një sulm i natës me dron rus në kryeqytetin ukrainas ka shkaktuar vdekjen e tre personave dhe plagosjen e 27 të tjerëve, përfshirë gjashtë fëmijë, njoftoi kryebashkiaku i qytetit, Vitali Klitschko.
Kreu i administratës ushtarake të Kievit tha herët të dielën se disa dronë rusë po operonin mbi qytet dhe paralajmëroi banorët të qëndronin në strehimore.
Sipas Klitschkos, fragmentet e dronit ranë mbi një ndërtesë banimi nëntëkatëshe në lagjen verilindore Desnyansky, duke shkaktuar zjarre në disa apartamente.
Në një ndërtesë tjetër në të njëjtën zonë u shpëtuan pesë persona, ndërsa fragmente të tjera dëmtuan një apartament në një bllok 16-katësh në lagjen veriore Obolonsky.
Sulmet vijnë një ditë pas një serie të tjera sulmesh me dronë dhe raketa ruse në Kiev, ku katër persona humbën jetën dhe rreth 20 u plagosën, sipas autoriteteve ukrainase.
Ndërkohë, përpjekjet diplomatike për një samit midis liderëve të SHBA-së dhe Rusisë duket se janë minimalizuar. Të shtunën, presidenti amerikan Donald Trump tha se nuk do të “humbiste kohën kot” për një takim me Vladimir Putin.
Komentet erdhën ndërsa negociatori i Kremlinit, Kirill Dmitriev, u takua me zyrtarë të administratës Trump, përfshirë të dërguarin special Steve Witkoff, dhe diskutimet pritej të vazhdonin të dielën./TheGuardian
