​Sulmi i fuqishëm në një xhami në Pakistan lë 16 të vdekur dhe 56 të plagosur

Të paktën 16 persona kanë humbur jetën dhe 56 të tjerë janë plagosur nga një shpërthim i fuqishëm, në një xhami, pranë zyrave policore në qytetin Kohat, veriperëndim të Pakistanit, të premten, raporton Associated Press.

Tragjedia, sipas shefit lokal të policisë dyshohet se ndodhi kur një sulmues përplasi një automjet të mbushur me eksploziv në objektin fetar.

Është konfirmuar se mes viktimave janë 5 policë dhe 11 civilë.

Shumica e të plagosurve ishin besimtarë që ndodheshin në xhami. Disa prej tyre janë në gjendje kritike.

Policia bëri të ditur se të paktën 2 persona të armatosur tentuan të hynin në kompleksin policor. Ata shkëmbyen zjarr me zyrtarët e sigurisë.

Fotografitë nga vendi i ngjarjes shfaqin murin e jashtëm të zyrave policore të rrëzuar. Xhamia pësoi gjithashtu dëme të mëdha.

Raportohet se shpërthimi u dëgjua nga një largësi e madhe dhe ngriti re tymi mbi zonë. Pas tij u dëgjuan edhe të shtëna me armë.

Kryeministri pakistanez Shehbaz Sharif e dënoi sulmin dhe shprehu dhimbje për viktimat. Ai kërkoi nga autoritetet përshpejtimin e operacioneve të shpëtimit.