Ndonëse konkursi i rregullt për pranimin e studentëve në Qendrën Studentore ka përfunduar, të rinjtë e Universitetit të Prishtinës ia kanë mësyrë një rruge tjetër për ta zënë një dhomë në konvikt, raporton T7.
Gazetare: Ardita Rashiti
Kanë arritur që ta fitojnë një dhomë në konvikt, në mesin e 6500 studentëve sa kanë aplikuar, megjithatë disa studentë kanë vendosur që të bëjnë pazare me këtë pozitë të fituar.
Në rrjetin social Facebook, në një grup ku më parë organizoheshin për test të maturës, studentët po shkëmbejnë dhomat e konvikteve, po e shesin kartelën e mensës e madje edhe dhomën e tyre.
“Shes menzën, për më shumë informata më kontaktoni në privat” shkruan një vajzë në këtë grup.
Të tjerë shprehin interesim ta blejnë një kartelë të tillë.
“Shes dhomën në konvikt” thuhet në një postim tjetër, ndërsa numri i komentuesve të interesuar, nuk është i vogël.
E ky mashtrim nuk është risi. Njëjtë kanë vepruar ndër vite studentët e Universitetit të Prishtinës, ndonëse jo çdoherë një përpjekje e tillë ka rezultuar me sukses. Kështu të paktën është shprehur drejtori i Qendrës Studentore, Fatmir Sfishta.
“Për çdo vit tentohet, por iu bëj thirrje sepse nëse një student ndodhë ta shesë kartën e vet studentit tjetër, merr përsipër për këtë veprim dhe përjashtohet menjëherë nga konvikti, rrjedhimisht nuk ka mundësi” ka thënë Sfishta.
Megjithatë ai thotë se një dukuri e tillë është në rënie, ndonëse akoma prezente.
Një veprim i tillë paraqet thyerje të rregullores së brendshme të Qendrës së Studentëve.
Edhe gjatë këtij viti ka pasur interesim të madh nga studentët që t’i bashkohen konvikteve.
Nga 6500 aplikantë janë pranuar 4000 prej tyre, ndërsa përparësi në konkurs kanë pasur studentët të cilët kanë notë mesatare më të lartë.
