Nënkryetari i Komunës së Skenderajt, Fadil Nura, ka takua banorët e fshatit Açarevë me të cilët ka bashkëbiseduar për projektet, që do të realizohen në këtë fshat në vitin 2017.
Nura i ka siguruar banorët se në vitin 2017 do të përfundojë projekti i asfaltimit të rrugëve të mbetura të lagjeve. Ai po ashtu ka theksuar se Komuna e Skenderajt, duke parë nevojën e açarevasve për ujë të pijshëm, ka hartuar projektin detal të ujësjellësit për këtë fshat.
Qytetarët pjesëmarrës janë interesuar dhe kanë bërë pyetje për datajet e projekteve aktuale dhe për ato që planifikohen në të ardhmen. Ata janë interesuar edhe për mundësinë e vazhdimit të restaurimit të objektit të kullës së Rrahman Azemit, objekt ky i trashëgimisë kulturore, në mbrojtje të përkohshme. Në këtë takim, përveç nënkryetarit Nura, kanë marrë pjesë edhe kryesuesi i Kuvendit, Ismet Salihu, dhe drejtori i Urbanizmit, Driton Mulaj.
