Riza Çitaku deri para dy vjetëve ka punuar si mësimdhënës në shkollën e mesme “Anton Çetta” në Skenderaj.
Ai thotë se i zotëron të gjitha kualifikimet shkollore, por nga puna është larguar sepse është sekretar i degës së LDK-së në këtë komunë, raporton KTV.
Njëjtë ka ndodhur edhe me Nazmi Rexhepin dhe Hamëz Spahiun. Që të dy janë ankuar kudo, por askush nuk po i merr parasysh.
Kryetari i degës së LDK-së në Skenderaj, Isa Fejzullahu, tha se kanë larguar nga puna njerëz profesionistë dhe kjo nuk duhej të ndodhte.
Por, të gjitha këto i përgënjeshtron drejtori i arsimit në këtë komunë, Jashar Lushtaku.
Sipas tij, ashtu siç ka thënë ministri i Arsimit, Arsim Bajrami, profesorët i kanë sistemuar nëpër vende pune, pas shuarjes së klasës së 13-të, por këta 7 profesorë nuk kanë pasur kualifikimet e duhura.
Lushtaku është shprehur se vet Ministria e Arsimit në çdo ankesë të paraqitur nga këta ish-profesorë, ka kthyer përgjigje negative, sepse nuk i kanë plotësuar kushtet për mësimdhënie.
KTV-ja ka kërkuar përgjigje nga Azem Guri, këshilltar i ministrit të Arsimit, i cili është takuar edhe me ish-mësimdhënësit e larguar nga puna, por kontakti me të ka qenë i pamundur.
