Një paraqitje luftarake në “Estadio de Mendizorroza” kundër Mallorcës bëri që Deportivo Alavési të fitojë 2-1, duke u larguar nga zona e rënies në La Liga dhe duke kaluar edhe kundërshtarin në renditje.
Alavési u detyrua të bëjë një zëvendësim që në minutën e katërt, pasi Lucas Boyé nuk mundi të vazhdonte lojën.
Zëvendësuesi i tij, Ibrahim Diabate, ishte lojtari i vetëm nga të dy ekipet që tentoi drejt portës në çerekun e parë të ndeshjes.
Vendasit e morën iniciativën, por në sulmin e parë serioz, Mallorca kaloi në epërsi, kur Jan Virgili realizoi një goditje të shkëlqyer me të djathtën nga jashtë zone në këndin e sipërm.
Pavarësisht posedimit më të madh, sulmet e Alavésit shpesh ndaleshin nga mbrojtja e organizuar e mysafirëve, me kapitenin Martin Valjent që udhëhiqte prapavijën me shumë siguri.
Në minutën e 30-të, një goditje dënimi nga Carlos Aleñá krijoi kaos në zonën e Mallorcës, ndërsa tentativa akrobatike e Nahuel Tenaglia u ndal nga portieri Leo Román.
Pjesa tjetër e pjesës së parë u zhvillua kryesisht në mesfushë, me pak raste konkrete deri në pushim.
E njëjta tablo vazhdoi edhe në fillim të pjesës së dytë, ku Alavési0 nisi më mirë, por më pas u tërhoq në mbrojtje duke i lënë hapësira kundërshtarit.
Kur dukej se Mallorca po merrte kontrollin, Toni Martínez u ngrit më lart se të gjithë në zonë dhe shënoi me kokë pas një goditjeje nga këndi, duke barazuar rezultatin dhe duke realizuar golin e tij të 10-të sezonal.
Me pak më shumë se 20 minuta nga fundi, Martínez ishte sërish në vendin e duhur në kohën e duhur dhe, pas një kombinimi të bukur me Ángel Pérezin, goditja e tij u devijua dhe përfundoi në rrjetë, duke i dhënë epërsinë vendasve.
Pérez vazhdoi të krijojë probleme në krahun e majtë për mysafirët, duke ndihmuar ekipin e tij të kontrollojë fundin e ndeshjes.
Sulmuesi i kombëtares së Kosovës, Vedat Muriqi e kompletoi tërë ndeshjen, mirëpo nuk arriti të shënojë për ndeshjen e dytë radhazi në La Liga.
Ai u vlerësua me notën 5.6 nga “Flashscore”, pra një ndeshje e dobët nga “Pirati dardan”, i cili ka 21 gola në La Liga këtë edicion.
Ky rezultat shënon vetëm fitoren e dytë në shtëpi për Alavésin në tetë ndeshjet e fundit, si dhe vetëm të dytën në total në 11 ndeshjet e fundit të kampionatit.
Ndërkohë, Mallorca vazhdon me vetëm një fitore si mysafir në sezonin 2025/26.
Me këtë fitore, skuadra vendase shkon në kuotën e 36 pikëve në vendin e 15-të, një më shumë se Mallorca që është në vendin e 16-të.
Vendi i 18-të që bie në La Liga, i ka 34 pikë momentalisht, dhe mbahet nga Sevilla./GazetaExpress/
