Ambasadorja Viets shprehu gatishmërinë e saj dhe të shtetit gjerman për të mbështetur edhe më tej Kosovën në agjendën e saj evropiane.
Kryetarja e Komisionit për Integrime Evropiane, Njomza Emini, takoi sot ambasadoren e Republikës Federale të Gjermanisë në Kosovë, Angelika Viets. Kryetarja Emini, pasi e falënderoi ambasadoren për vizitën, e njoftoi atë për aspekte nga fushëveprimtaria e komisionit, me theks të veçantë për angazhimet që ndërlidhen me integrimet e vendit në mekanizmat ndërkombëtarë.
Në vijim të takimit, kryetarja e komisionit falënderoi ambasadoren Viets edhe për mbështetjen e Gjermanisë në procesin e integrimit evropian të Kosovës, si dhe përkrahjen e vazhdueshme nëpërmjet projekteve të GIZ-it për Kuvendin e Kosovës, posaçërisht Komisionin për Integrime Evropiane.
Ambasadorja Viets, ndërkaq, duke e uruar kryetaren Emini për detyrën e re në krye të këtij komisioni të rëndësishëm të Kuvendit, shprehu gatishmërinë e saj dhe të shtetit gjerman për të mbështetur edhe më tej Kosovën në zhvillimin e saj dhe në agjendën evropiane.
