Pavarësisht shifrave gjithnjë në rritje të eksporteve, kultivimi tej kërkesave të tregut po ndëshkon fermerët. Të kënaqur nga fitimi i një viti më parë, fermerët këtë vit pothuajse dyfishuan siperfaqen e mbjellë, nga 250 ha ata mbollën 400 ha. Por fermerët kurrë nuk menduan se do ndodhen para mungesës së tregut dhe çmimeve të ulta, për shkak të mbiprodhimit.
Nëpër fushat e Lushnjës dhe Fierit shihen tonelata me shalqinj që po shkojnë drejt kalbjes dhe fermerë të dëshpëruar dhe zemëruar. “Ne këtë prodhim e kemi me kredi. Banka do lekët. Nuk i dhe lekët të sekuestron shtëpinë” thotë një fermer në fshatin Imsht. “Ne mbaruam! Ky është fati ynë!” thotë ai.
Bashkë me shumë fermerë të tjerë ata e nxjerrin dufin duke përplasur shalqinjtë në tokë.
Në rastin më të mirë, çmimi i tregut me shumicë është 3 – 5 lekë për kilogram. “Çmimi sivjet është zero. ka shkuar 5 lekë. Nga vapa e madhe ai digjet” thotë një fermer në pikën e grumbullimit të shalqiri. “Ne nuk ushqejmë dot jo familjen, por as veten tonë” shton një bashkëfshatar i tij. “Plehrat e shtrenjta, shalqiri me 4-5 lekë”.
Tonelata me shalqi po kalben edhe në parcelat e fermerëve të Kafaraj në Fier. “Në 6 dynymë, 59 ton shalqi i hedh poshtë” thotë një fermer. “Çmimet jane katastrofale sivjet…vetë tregu ta dikton çmimin edhe…” thotë një bashkëfshatar i tij. Gjatë kësaj jave çmimet e bostanit dhe shalqirit kane kapur nivelin më të ulët të pesë viteve të fundit./rtsh.al
