Ministri i Arsimit, Shkencës dhe Teknologjisë, Arsim Bajrami, ka ndarë çmimet vjetore “Shkencëtari i vitit” 2016, për rezultate të jashtëzakonshme kërkimore- shkencore për gjatë periudhës një vjeçare për shkencëtarët Prof. Ass. Shukri Klinaku dhe Prof. Ass. Kreshnik Hoti, si dhe “Shkencëtari i ri i vitit” 2016 për rezultate dhe potenciale të larta kërkimore- shkencore për shkencëtarët e rinjë, Dr. Bujar Shabani dhe Dr. Haki Jashari.
Ministri Bajrami, pasi ka vlerësuar lartë punën kërkimore- shkencore të studiuesve ka theksuar se, MAShT ka një traditë disa vjeçare të stimulimit të hulumtuesve për punën dhe të arriturat vjetore.
“Tradita jonë e ndarjes së këtij çmimi është një simbolikë dhe mirënjohje për hulumtuesit të cilët kanë kryer një punë të mirë gjatë vitit. MAShT po punon që të rrisë fondet, në mënyrë që të stimulojë hulumtuesit e rinjë. Jemi duke punuar që ti ndërkombëtarizojmë këto të arritura vendore”, është shprehur Ministri.
Duke uruar laureatët, ministri Bajrami tha se, MAShT ka bërë përzgjedhje kredibile dhe është e përkushtuar që të përkrahë studiuesit e rinjë dhe punën e tyre kërkimore- shkencore, e cila do të ndihmonte edhe në zhvillimin ekonomik të vendit. Ndër të tjera, Ministri ka folur edhe për perspektivën evropiane të këtyre të hulumtuesve, duke theksuar se, BE ka hapur derën për përfitimin e fondeve të reja, të cilave duhet t’ u qasen hulumtuesit kosovarë.
Si shkencëtar i ri me potencial të lartë kërkimor-shkencor është vlerësuar edhe drenicasi Dr. Haki Jashari në fushën mjekësore. Jashari ka përfunduar studimet e doktoraturës në Universitetin Umeå të Suedisë, është autor i disa punimeve shkencore në revista ndërkombëtare. Aktualisht është duke bërë specializimin në Klinikën Pediatrike të Qendrës Klinike dhe Universitare të Prishtinës. /Drenica Press/
