Ish-deputeti i LDK’së, Driton Selmanaj, ka reaguar lidhur me skandalin e fundit që ka shpërthyer në vend lidhur me ekspozitën me të dhëna të pasakta për masakrat e ku protagonist është ish-këshilltari i Albin Kurtit, Shkëlzen Gashi.
Selmanaj ka thënë se s’ka vend për habi, duke thënë se Kurti kishte glorifikuar Gjingjiqin dhe se kishte heroizuar Ivanoviqin.
Gjithashtu Selmanaj ka përmendur bisedën e Kusari-Lilës me Millan Radojiqiqin. Sipas Selmanajt, edhe ekspozita me të dhëna të gabuara nuk është e rastësishme.
“Këto zhvillime janë pjesë e një agjende të mirëplanifikuar për rishkrimin e së vërtetës historike që ka përjetuar populli ynë dhe për ndërtimin e një narrative që dëmton rëndë interesin kombëtar të Kosovës”, ka shkruar Selmanaj.
Ai ka thënë se edhe beteja e LVV’së me Listën Serbe është pjesë e së njejtës agjendë.
Postimi i plotë:
Nuk ka vend për habi.
Glorifikimi i figurës së ish-kryeministrit të Serbisë, Zoran Gjingjiq, nga Albin Kurti;
Heroizimi i një të dënuari për krime lufte ndaj shqiptarëve, Oliver Ivanoviq;
Narrativa e vazhdueshme e Albinit dhe e LVV-së se edhe UÇK-ja ka kryer krime në Kosovë;
Koordinimi, përmes telefonit, i Mimoza Kusarit me kriminelin Milan Radojqiq; si dhe
Ekspozita e fundit e Shkëlzen Gashit dhe bashkëpunëtorëve të tij në sheshin kryesor të kryeqytetit të financuar nga paratë e shtetit,
Nuk janë të rastësishme.
Këto zhvillime janë pjesë e një agjende të mirëplanifikuar për rishkrimin e së vërtetës historike që ka përjetuar populli ynë dhe për ndërtimin e një narrative që dëmton rëndë interesin kombëtar të Kosovës.
Kjo narrativë e rrezikshme synon relativizimin e krimeve, zbehjen e sakrificës së popullit tonë dhe krijimin e një barazimi të papranueshëm mes agresorit dhe viktimës.
P.S. Edhe e ashtuquajtura “betejë” me Listën Serbe është pjesë e të njëjtës agjendë.
