Prishtina, të mërkurën, është eliminuar nga Besa në çerekfinale të Kupës së Kosovës në futboll. Por skuadra prej më të mëdhave në vend mund të përfitojë nga një zhvillim i pak ditëve më parë në klubin pejan.
Gani Sejdiu, trajneri mitrovicas prej më të vlerësuarve në vend, dha dorëheqjen nga Besa e Pejës, të dielën, menjëherë pas ndeshjes së humbur nga Trepça ’89. Dhe Sejdiu shumë shpejt pritet të zyrtarizohet si trajner i Prishtinës. Por ai punën te skuadra e kaltër do të nisë vetëm në verë, kur Prishtina të fillojë përgatitjet për edicionin e ardhshëm 2017/18, shkruan sot Koha Ditore.
Natyrisht nëse arrihet marrëveshja me drejtuesit e Prishtinës. Kontaktet mes palëve kanë nisur tashmë, kanë njoftuar burime të gazetës brenda klubit.
Të martën, Sejdiu ka pasur takim me drejtues të Prishtinës. Në takim prezent ishin edhe gjermani Lutz Lindemann që është drejtor sportiv, por që aktualisht po e kryen edhe detyrën e kryetrajnerit, si dhe ndihmësi i tij, Mentor Miftari.
