Sami Lushtaku: Para varrit të Adem Jasharit, kujtojmë se u bën 18 vite nga kurorëzimi i sakrificës shekullore me Pavarësinë e Kosovës (FOTO)

Me rastin e 18-vjetorit të shpalljes së Pavarësisë së Kosovës, Sami Lushtaku ka kujtuar me nderim dhe përulje sakrificën shekullore të popullit shqiptar, e cila u kurorëzua më 17 shkurt 2008 me shpalljen e shtetit të pavarur të Kosovës.
Ai bëri homazhe në Prekaz, vendin ku qëndresa u shndërrua në themel të lirisë, si dhe në Morinë, simbol i bashkimit dhe nderimit të dëshmorëve të luftës çlirimtare.
Në këtë përvjetor, Lushtaku theksoi me krenari kontributin e udhëheqësve të luftës dhe të shtetndërtimit, duke përmendur Hashim Thaçi, Kadri Veseli, Jakup Krasniqi dhe Rexhep Selimi, të cilët, sipas tij, i prinë rrugëtimit drejt lirisë, pavarësisë dhe konsolidimit të shtetit.
“Liria dhe pavarësia e fituar me gjak e sakrificë do të ruhet me nder dhe me punë të palodhshme në shërbim të vendit”, theksoi ai.
Në përmbyllje, Lushtaku uroi qytetarët për 18-vjetorin e Pavarësisë, duke shprehur mirënjohje të përhershme për të gjithë ata që kontribuuan në realizimin e kësaj dite historike.