Ka vdekur nëna e dy dëshmorëve nga Qirezi i Skenderajt, Hateme Nebihu. Të ndjerës serbët ia kishin vrarë dy djemë dhe nusen e djalit.
Ish kryetari i Skenderajt, Sami Lushtaku, është shprehur i pikëlluar për vdekjen nënës Hateme Nebihu.
“Më pikëlloi lajmi për vdekjen e nënës Hateme Nebihut nga Qirezi. Me 28 Shkurt 1998 në shtëpinë e saj në Qirez, forcat serbe ja vranë dy djemtë Xhemshirin e Ilirin si dhe nusën e djalit, Rukijen e cila ishte shtatzënë. Të gjitha këto tmerre u kryen në sy të familjes dhe të fëmijëve. Nënë Hatemja ndonëse e tronditur, po mbulonte viktimat e masakrës por edhe po qetësonte nipat e mbesat nga skena e tmerrshme që panë atë ditë”, ka shkruar Lushtaku.
Ai ka shtuar se krimet serbe nuk harrohen e as nuk do amnistohen kurrë.
“Këto krime serbe nuk harrohen e as nuk do amnistohen kurrë. Janë krime kundër njerëzimit për të cilat fajtorët duhet të japin llogari para drejtësisë. Është obligim ndaj lokës Hateme dhe qindra e mijëra nënave shqiptare që presin drejtësi për fëmijët, bashkëshortët e familjarët e tyre, që këto krime të ndriqohen”, ka shtuar Lushtaku./Drenicapress
