Rusia nis sulmin më të madh ndaj infrastrukturës energjetike të Ukrainës që nga pranvera
Rusia ka ndërmarrë sulmin më të madh ndaj infrastrukturës energjetike të Ukrainës që nga pranvera, duke vënë në shënjestër kryesisht Kievin dhe rajonin përreth, ka deklaruar kryeministri i Ukrainës, ka raportuar BBC, transmeton Gazeta Express.
Të paktën pesë persona humbën jetën në sulmet e kryera gjatë natës në mbarë vendin, përfshirë një fëmijë në rajonin e Kievit, tha Serhiy Koretskyi.
Sulmet ndikuan gjithashtu në furnizimin me energji elektrike; kompania më e madhe private e energjisë në Ukrainë, DTEK, njoftoi se energjia ishte rikthyer në 8,000 shtëpi pas “një nate të vështirë” për kryeqytetin.
Ministria ruse e Mbrojtjes deklaroi se një nga objektivat e saj ishte termocentrali “Trypilska”, furnizuesi më i madh me energji elektrike për Kievin. Operatori konfirmoi dëmtimin e impiantit.
Koretskyi shkroi në Telegram: “Që nga vera, praktikisht nuk ka kaluar asnjë ditë pa sulme të armikut ndaj infrastrukturës sonë energjetike.
Lexo edheIsh-diplomati amerikan paralajmëron se sinjalet e përziera mund t’i dobësojnë sanksionet ndaj Rusisë
“Megjithatë, një sulm masiv dhe i kombinuar i këtyre përmasave ka ndodhur për herë të parë që nga përfundimi i sezonit të kaluar të ngrohjes.”
Ukraina ka qenë në pritje të një tjetër sulmi të zgjatur rus ndaj rrjetit energjetik të vendit. Kjo ka ndodhur çdo dimër që kur nisi pushtimi rus në shkallë të plotë në vitin 2022.
Në total, 11 rajone të vendit u sulmuan gjatë natës, duke vënë në shënjestër gjithashtu ndërtesa banimi, infrastrukturë sociale, ndërmarrje civile dhe hekurudha, tha Koretskyi.
