Ministria e Punëve të Brendshme e Maqedonisë së Veriut ka paralajmëruar se do të informojë me kohë qytetarët për rregullat e reja që do të vlejnë për udhëtimin në vendet e Bashkimit Evropian, me qëllim që të mos krijohen vonesa në pikat kufitare.
Drejtori i Byrosë për Siguri Publike, Aleksandar Janev, tha sot se janë në komunikim të vazhdueshëm me partnerët evropianë dhe se, sipas rregullativës aktuale, qytetarët do të duhet të plotësojnë aplikacione online për hyrje. Ky proces, siç u tha, do të zgjasë pak minuta, por do të ketë vlefshmëri dyvjeçare.
“Sipas rregullave të BE-së, aplikacioni do të plotësohet online. Do të marrë pak kohë, por do të vlejë për dy vite. Kur të kemi informacion zyrtar nga BE-ja, ai do të ndahet menjëherë me qytetarët tanë. Është detyrimi ynë t’i njoftojmë plotësisht për të shmangur pengesat në kufi,” deklaroi Janev.
Sistemi i ri i hyrje-daljes (EES) do të nisë më 12 tetor 2025 dhe do të zbatohet gradualisht brenda gjashtë muajve në 29 vende evropiane (25 anëtare të BE-së të zonës Shengen, plus Islanda, Lihtenshtajni, Norvegjia dhe Zvicra). Implementimi i plotë pritet të nisë më 10 prill 2026, kur do të fillojë edhe llogaritja elektronike e ditëve të qëndrimit në BE.
Ndërkohë, për sistemin tjetër, ETIAS, ende nuk kërkohet ndonjë veprim nga udhëtarët. BE do të informojë me kohë për datën e saktë të fillimit të tij.
