Kryeministri Edi Rama ka reaguar në rrjetet sociale pas kundërpërgjigjeve të Iranit, i cili ka goditur me raketa edhe Dubain në Emiratet e Bashkuara Arabe. Kreu i qeverisë shprehet se këto veprime janë sulm ndaj stabilitetit, prosperitetit dhe vetë idesë se Lindja e Mesme mund të përcaktohet nga paqja dhe jo lufta. Sulmet me raketa në Dubai, ai i konsideron si shfaqja e natyrës së vërtetë të regjimit në Teheran.
“Shënjestrimi i një oazi paqësor si Dubai me raketa urrejtjeje dhe shkatërrimi zbulon edhe një herë natyrën e vërtetë të regjimit mesjetar në Teheran. Ky është refleksi i një sistemi të destinuar të dështojë, një sistemi që eksporton dhunë dhe përdor terrorin si armë kundër fqinjëve që kërkojnë paqe, për t’i frikësuar jo vetëm ata, por para së gjithash popullin e vet që kërkon liri. Emiratet e Bashkuara Arabe janë bërë një simbol global i promovimit të paqes, hapjes ndaj dialogut, dinamizmit ekonomik, bashkëjetesës ndërfetare dhe vitalitetit kulturor. Ato përfaqësojnë një model se si mund të duket një Lindje e Mesme moderne: e sigurt në vetvete, e ndërlidhur, me vizion përpara dhe thjesht e bukur. Të godasësh verbërisht kundër saj do të thotë të godasësh vetë mundësinë e një rajoni që ka zgjedhur zhvillimin mbi shkatërrimin, bashkëpunimin mbi përballjen, paqen mbi luftën”, shkruan Rama.
Pasi shpreh mbështetjen e plotë dhe të palëkundur për Emiratet e Bashkuara Arabe, kreu i qeverisë shqiptare thekson se siguria në Gjirin Persik është një domosdoshmëri globale.
“Shqipëria qëndron në solidaritet të plotë dhe të palëkundur me udhëheqjen dhe popullin e Emirateve të Bashkuara Arabe. Siguria në Gjirin Persik nuk është një çështje lokale; ajo është një domosdoshmëri globale. Çdo përpjekje për ta destabilizuar atë kërcënon jo vetëm rrugët energjetike, korridoret tregtare dhe arkitekturën e brishtë të paqes rajonale, por edhe ekuilibrin më të gjerë të sigurisë ndërkombëtare. Komuniteti ndërkombëtar duhet të flasë me qartësi dhe unitet: agresioni i sponsorizuar nga shteti, sulmet me raketa kundër mjediseve civile dhe destabilizimi i qëllimshëm nga një regjim që vret popullin e vet në shkallë masive nuk mund të lënë asnjë vend për Republikën Khomeiniste në bashkësinë e kombeve, pavarësisht dallimeve në sisteme apo pikëpamjeve politike. Rruga përpara për rajonin nuk shkruhet me raketa, por me njohje të ndërsjellë, integrim ekonomik dhe udhëheqje të përgjegjshme. Emiratet e Bashkuara Arabe, nën drejtimin vizionar të liderit të tyre të madh, Presidentit Mohammed Bin Zayed, kanë zgjedhur të jenë një far stabiliteti dhe përparimi për të gjitha kombet që duan paqen. Ata që zgjedhin errësirën dhe shkatërrimin duhet ta gjejnë veten të izoluar nga një botë që qëndron për stabilitet, bashkëpunim dhe paqe”, shkruan Rama.
Kujtojmë se lideri suprem i Iranit, Ajatollah Ali Khamenei, u vra në zyrën e tij të shtunën në mëngjes gjatë sulmeve ajrore të përbashkëta SHBA–Izrael. Lajmi u konfirmua nga mediat shtetërore. Presidenti Donald Trump tha se Khamenei ishte “një nga njerëzit më të këqij në histori” dhe u bëri thirrje iranianëve të “marrin mbrapsht vendin e tyre”.
