Mbi një metër ujë nga reshjet të hënën mbrëma në fshatin Pataqan të Poshtëm të Rahovecit.
Një ditë pas, banorët e këtushëm u përballën me pasojat e shiut.
Mendim Hajredinit ujërat atmosferike i hynë në shtëpi duke i shkatërruar të gjitha orenditë dhe mjetet e amvisërisë, raporton KTV.
Për shkak të kësaj situate, Mendimi ka braktisur shtëpinë, ndërsa të martën është marrë vetëm me pastrimin e saj.
Ai kërkon nga komuna t’ia kompensojë dëmet që i konsideron deri në 4 mijë euro.
Përveç dëmit në objekte, të reshurat e së hënës kanë shkaktuar dëme edhe në toka bujqësore.
Rreth 5 hektarët e mbjellë me kultura të ndryshme bujqësore, i janë shkatërruar Besart Hajredinit.
Sipas banorëve, arsyeja pse fshati u vërshua nga uji është një përroskë, të cilën komuna nuk e ka pastruar një kohë të gjatë.
E zyrtarët komunalë kanë thënë se do ta pastrojnë edhe përroskën, si dhe do t’u dalin në ndihmë banorëve, pasi të bëhet llogaritja e dëmeve.
Përveç Pataqanit të Poshtëm, edhe katër fshatra të tjera të Rahovecit kanë pasur probleme nga reshjet.
