Qeveria e Kosovës ka ndarë të martën afër 60 mijë euro mjete për pagesën e punonjësve me kontrata për shërbime të veçanta në rezidencën presidenciale “Ibrahim Rugova” (57 mijë e 934 euro).
Këtë vendim, kabineti qeveritar e mori në mbledhjen e Qeverisë së Kosovës që po mbahet sot.
Po ashtu, Qeveria e Kosovës ka marrë vendim që t’i vazhdojë mandatin Komisionit Qeveritar për Njohjen e Statusit të ish të dënuarve dhe të ish të përndjekurve politik, ka miratuar ndalimin e përkohshëm të eksportit të masës drunore si lëndë e papërpunuar nga Kosova në drejtim të vendeve tjera për arsye të dëmtimit në sektorin e përpunimit të drurit në Kosovë.
Në këtë mbledhje u miratuan edhe drafti i koncept dokumentit për politiken “Aplikimi për vende pune nga pjesëtarët e komuniteteve jo shumicë, që posedojnë diploma të lëshuara nga institucionet paralele arsimore në Kosovë ku zhvillohet mësimi në gjuhën serbe, drafti i strategjisë kombëtare të Kosovës për parandalimin dhe luftimin e ekonomisë joformale, pastrimin e parave, financimin e terrorizmit dhe krimeve financiare 2019-23 dhe planin e veprimit 2019-21.
Në këtë pikë, ministri i Arsimit, Shkencës dhe Teknologjisë, Shyqiri Bytyqi u shpreh se për këtë duhet të jetë i informuar edhe MAShT-i, si institucion i cili edhe lëshon certifikatat.
Në kuadër të kësaj mbledhje u miratua edhe nisma për lidhjen e marrëveshjes dy palëshe për qarkullimin ndërkufitar të mbeturinave, respektivisht eksportin e importin e mbeturinave me Republikën Federale të Gjermanisë dhe atë të Kroacisë. Ndërsa u miratua edhe propozim-vendimi për emërimin e drejtorit të përgjithshëm të Agjencisë së Punësimit të Republikës të Kosovës, në kuadër të Ministrisë së punës dhe Mirëqenies Sociale.
Kurse, zëvendësministrja e MAP-së, Adriana Hoxhiq, prezantoi raportin për funksionimin e kuvendeve të komunave për periudhën janar-mars 2019.
