Pa Cavani, Mbappe, Marquinhos, Dani Alves dhe Verratti, të lënë pushim nga trajneri Unai Emery dhe pa Neymar të dëmtuar, Paris SG ka fituar 2-0 në fushën e Troyes, duke ruajtur 14 pikët avantazh në krye të Ligue 1 ndaj Monaco, që kishte fituar 2-1 të premten ndaj Bordeaux. Në këtë mënyrë, kur mbeten edhe 10 javë nga fundit duket se skuadra kryeqytetase e ka hipotekuar titullin kampion dhe mund të përqendrohet te sfida e Champions League kundër Real Madrid, ku të martën në “Parc des Princes” do të synohej përmbyja e humbjes 3-1 të pësuar tri javë më parë në Spanjë…
Goli i parë në fushën e Troyes, erdhi në minutën e parë të pjesës së dytë dhe u firmos nga Angel Di Maria. Argjentinasi mori një pasim të shkëlqyer nga qendërsulmuesi i “improvizuar” Julian Draxler dhe mposhti portierin vendas duke e kaluar topin sipër trupit të tij. Ky ishte goli i nëntë i Di Maria në këtë sezon. Ndërkohë, dhjetë minuta Christopher Nkunku, sulmuesi 20-vjeçar, realizoi golin e dytë për miqtë në ndeshjen e tij të parë si titullar në Ligue 1. Pas kësaj humbje Troyes mbeten në zonën e ftohtë dhe ndan vendin e fundit të disponueshëm për të qëndruar në “elitë” bashkë me Toulouse dhe Angers.
