Më shumë se një muaj e gjysmë pas zgjedhjes së Hashim Thaçit në postin e presidentit të Republikës së Kosovës, Departamenti i Protokollit të Shtetit pranë Ministrisë së Jashtme të Kosovës, është detyruar t’ua “përkujtojë” edhe një herë institucioneve të shtetit se e kanë obligim ligjor që në zyrat e tyre ta vendosin foton zyrtare të kreut të presidentit të ri.
Në një porosi dërguar të gjitha institucioneve shtetërore, si dhe misioneve diplomatike dhe konsullore jashtë vendit, Protokolli i Shtetit ka bashkangjitur foton zyrtare të presidentit Thaçi, të cilit i referohet si “SHTZ Hashim Thaçi” (“Shkëlqesia e Tij Zotëri Hashim Thaçi”), shkruan sot “Koha Ditore”.
Duke u bazuar në legjislacionin në fuqi, Protokolli i Shtetit i përkujton të gjitha institucionet e vendit se me ligj janë të obliguara që këtë portret të presidentit Hashim Thaçi ta vendosin në zyrat e institucioneve, derisa bashkë me foton, ua ka dërguar institucioneve edhe “Rregulloren nr.19/2011 për kriteret e përzgjedhjes dhe vendosjes së fotografisë së presidentit të Republikës së Kosovës”. Në mesazh po ashtu ritheksohet nenin 4 i kësaj Rregulloreje, i cili përcakton formën, dimensionet e fotos dhe vendin e vendosjes së fotos së përzgjedhur zyrtare.
