Presidenti i Hungarisë, H.E. Tamás Sulyok, zhvilloi sot një vizitë zyrtare në selinë e misionit të NATO-s, KFOR, në Camp Film City në Prishtinë, ku u prit nga Komandanti i KFOR-it, Major General Özkan Ulutaş.
Presidenti Sulyok ishte i shoqëruar nga Zëvendësministri hungarez i Mbrojtjes, H.E. Tamás Vargas, si dhe nga Ambasadori i Hungarisë në Kosovë, H.E. László István Dux, shkruan IndeksOnline.
Gjatë takimit, Major General Ulutaş informoi presidentin hungarez mbi situatën e sigurisë në Kosovë dhe në rajon, si dhe mbi angazhimet e vazhdueshme të KFOR-it. Ai theksoi përkushtimin e palëkundur të misionit për të kontribuar në një mjedis të sigurt për të gjithë qytetarët në Kosovë, duke vlerësuar njëkohësisht kontributet e gjata dhe të vazhdueshme të Hungarisë në KFOR dhe në stabilitetin rajonal.
“KFOR vazhdon të zbatojë mandatin e tij të bazuar në Rezolutën 1244 të Këshillit të Sigurimit të OKB-së të vitit 1999, duke garantuar siguri dhe liri të lëvizjes për të gjithë qytetarët, në mënyrë të paanshme dhe në çdo kohë. Misioni vepron në koordinim të ngushtë me Policinë e Kosovës dhe EULEX-in, secili në rolin e vet si përgjegjës për çështjet e sigurisë”, thuhet në njoftim./IndeksOnline/
