Në kuadër të planit operativ “Mbrojtja e pyjeve 2025”, Policia e Kosovës ka zhvilluar një aksion në Ferizaj, ku ka ndaluar tre automjete me targa vendore që transportonin dru pa dokumentacionin e nevojshëm.
Sipas njoftimit, automjetet dhe lënda drusore janë sekuestruar nga zyrtarët e pylltarisë për procedura të mëtejme ligjore.
Policia Rajonale e Ferizajt ka bërë të ditur se, në bashkëpunim me zyrtarët e pylltarisë, do të vazhdojë angazhimin në parandalimin dhe luftimin e prerjes dhe transportit të paligjshëm të drunjve.
Qytetarët janë ftuar të bashkëpunojnë duke raportuar rastet përmes numrave emergjentë 192 dhe 0290/326-250, ose përmes aplikacionit “Lajmëro Policinë”, me garanci të plotë për konfidencialitetin e informacioneve të raportuara.
