Policia e Kosovës ka njoftuar se në Viti disa zyrtarë policor janë sulmuar nga dy persona, të cilët ishin në veturë me një të dyshuar që kërkohej tash e 6 muaj nga drejtësia.
“Njësiti policor ka ndaluar automjetin Ford që drejtohej nga i dyshuari mashkull K-Shqiptar dhe tre bashkudhëtarë po ashtu të dyshuar meshkuj K-Shqiptarë. Gjatë verifikimit zyrtarët policorë kanë konstatuar se njëri nga të dyshuarit kërkohet me urdhëresë të Gjykatës Themelore për vuajtje të dënimit prej 6 muajve. Dy të dyshuarit (vëllezër) kanë sulmuar fizikisht zyrtarët policorë”, thuhet në raport.
Sipas policisë, si pasojë e sulmit të njëjtit kanë pësuar lëndime trupore dhe kanë pranuar tretman mjekësor. Dy të dyshuarit janë arrestuar dhe me urdhër të prokurorit dërgohen në mbajtje.
