Një plan i fshehtë i autoriteteve daneze për të penguar një pushtim të mundshëm amerikan në Groenlandë parashikonte shkatërrimin e pistave kryesore të uljes në ishullin arktik.
Qeveria e Kopenhagenit kishte përgatitur një strategji rezistence në rast të një ndërhyrjeje ushtarake nga Shtetet e Bashkuara, një skenar i përmendur disa herë në të kaluarën nga presidenti amerikan Donald Trump, raporton La Repubblica. Qëllimi i planit ishte ta bënte çdo operacion ushtarak amerikan sa më të kushtueshëm dhe të vështirë, duke shtyrë kështu Uashingtonin drejt një zgjidhjeje diplomatike.
Në këtë kuadër, një kontingjent trupash daneze i dërguar në Groenlandë në muajin janar, zyrtarisht për stërvitje ushtarake, kishte në fakt detyrën të transportonte sasi të konsiderueshme eksplozivi. Objektivi kryesor ishte shkatërrimi i pistave të aeroportit në Nuuk, kryeqyteti i territorit autonom, si dhe në Kangerlussuaq, një ish-bazë strategjike ajrore. Po ashtu, trupat kishin sjellë rezerva të mëdha gjaku, një tregues i qartë i përgatitjes për humbje të mundshme në rast përplasjeje.
Historikisht, Shtetet e Bashkuara kanë pasur një prani ushtarake në Groenlandë që nga Lufta e Dytë Botërore, kur ndërhynë për të parandaluar një pushtim të mundshëm nga Gjermania naziste pas okupimit të Danimarkës. Aktualisht, SHBA-të ruajnë ende një bazë në ishull, e përdorur për monitorimin e kërcënimeve raketore përmes Polit të Veriut. Pa akses në aeroportet kryesore, një operacion ushtarak në territorin e Groenlandës do të bëhej dukshëm më kompleks.
Burimet tregojnë gjithashtu se disa vende evropiane, përfshirë Francën dhe Gjermaninë, kanë dërguar trupa në Groenlandë muajt e fundit, zyrtarisht për stërvitje të përbashkëta, por në realitet për të forcuar mbrojtjen e ishullit si një faktor parandalues ndaj deklaratave të përsëritura të Trump për ta marrë Groenlandën “me çdo kusht”.
Kryeministrja daneze Mette Frederiksen e ka cilësuar situatën si krizën më të rëndë që nga viti 1945, duke theksuar rolin kyç të bashkëpunimit evropian në përballimin e saj. Ndërkohë, në samitin e fundit të Davosit, sekretari i përgjithshëm i NATO-s Mark Rutte thuhet se ka ndërmjetësuar për të çuar palët drejt një marrëveshjeje që respekton sovranitetin e Danimarkës dhe Groenlandës, duke marrë parasysh edhe interesat e sigurisë amerikane./klantv/
