Është ajo dita e vitit kur të gjithë çmendemi pas petullave: në mëngjes, drekë e darkë – dhe prapë duket sikur ka vend për “edhe një”.
Kombinimi klasik limon dhe sheqer, bananet, çokollata apo kremrat e ëmbël janë të preferuarit e shumëkujt.
Por, sado të shijshme, petullat tradicionale nuk janë gjithmonë zgjedhja më e shëndetshme, sidomos kur mbulohen me sheqer dhe shurupe.
Nutricionistja Ann Garry sugjeron disa zëvendësime të thjeshta, si në përbërje ashtu edhe në mbushje, për t’i bërë petullat më ushqyese dhe më ngopëse.
Pse petullat klasike nuk ngopin?
Receta bazë – miell i bardhë, vezë dhe qumësht – tretet shumë shpejt. Kjo sjell rritje të menjëhershme të sheqerit në gjak dhe, pas pak kohe, uri sërish. Prandaj, edhe pas disa petullave, shpesh ndiheni sikur doni më shumë.
Zëvendësime të zgjuara në brumë
Mielli i bardhë → zëvendësojeni me miell bajamesh ose tërshërë të bluar.
Këto kanë më shumë fibra dhe proteina, që ngopin më gjatë.
Sheqeri në brumë → hiqeni fare. Nuk është i domosdoshëm.
Shtesa ushqyese → fara chia ose fara liri për më shumë fibra dhe proteina.
Fuqia e përbërësve “kompleksë”
Ushqimet komplekse treten më ngadalë dhe çlirojnë glukozën gradualisht në gjak. Proteinat dhe fibrat qëndrojnë më gjatë në stomak, aktivizojnë hormonet e ngopjes dhe ju bëjnë të ndiheni “të ngopur për më gjatë”. Kjo është arsyeja pse petullat me miell bajamesh ose tërshëre janë shumë më të qëndrueshme energjikisht se ato me miell të bardhë.
Më të mira edhe për zorrët
Zorrët “duan” shumëllojshmëri bimore. Alternativat si bajamet dhe tërshëra sjellin fibra të ndryshme që ushqejnë mikroorganizmat e dobishëm në zorrë. Kjo mbështet tretjen dhe shëndetin e përgjithshëm.
Zgjidhje të përballueshme
Mielli i bajamesh mund të jetë i shtrenjtë, por tërshëra është shumë ekonomike: mjafton ta bluani në blender dhe keni miell tërshëre gati.
Për ata që duan shijen klasike limon-sheqer, një alternativë është ksilitoli (me masë), i cili nuk shkakton rritje të forta të sheqerit në gjak.
Mbushjet më të shëndetshme
Kos grek + banane e shtypur (më shumë proteina dhe kremozitet)
Fruta të freskëta, sidomos ato të stinës
Komposto shtëpie me mollë ose dardhë (me lëkurë, pa sheqer)
Kos grek + kakao dhe pak gjalpë arrash (bajame, lajthi ose kikiriku)
Këto zgjedhje shmangin shpërthimet e sheqerit që sjellin kremrat industrialë, shurupet dhe çokollatat e përpunuara.
Recetë e thjeshtë: Petulla me banane (2 përbërës)
Për 4 persona (9–12 petulla të vogla)
Këto petulla janë delikate dhe nuk duan hedhje në ajër.
Përbërësit
4 vezë
1 banane e pjekur
1 lugë çaji vaj ulliri (për tiganin)
Përgatitja
Bluani vezët dhe bananen derisa të bëhen masë e njëtrajtshme.
Ngrohni tiganin në zjarr mesatar dhe shtoni vajin.
Hidhni nga një lugë gjelle për çdo petull, duke lënë hapësirë mes tyre.
Gatuajini 1–2 minuta derisa të mpiksen lehtë, kthejini me spatulë me kujdes.
Piqni edhe anën tjetër rreth 1 minutë.
Shërbimi
Shërbejini të ngrohta me manaferra, kos grek ose pak gjalpë arrash. /GazetaExpress/
