Sekretari i Përgjithshëm i OKB-së, António Guterres, ka emëruar shef të UNMIK-ut në Kosovë, Peter Due nga Danimarka.

Lajmi për këtë është dhënë përmes faqes zyrtare të UNMIK-ut në “X”, shkruan lajmi.net.

“Sekretari i Përgjithshëm i OKB-së ka emëruar z. Peter N. Due nga Danimarka si Përfaqësuesin e tij të ri Special dhe Shef të Misionit të Administratës së Përkohshme të Kombeve të Bashkuara në Kosovë”, thuhet në njoftimin e UNMIK-ut.

“Z. Due pason Caroline Ziadeh nga Libani, të cilës Sekretari i Përgjithshëm i është mirënjohës për përpjekjet e saj të përkushtuara për të çuar më tej paqen dhe stabilitetin në Kosovë dhe rajon, si dhe për udhëheqjen e saj efektive të Misionit. Z. Due sjell në këtë pozicion 30 vjet përvojë të gjerë në paqen dhe sigurinë ndërkombëtare. Që nga viti 2019, ai ka shërbyer si Drejtor për Azinë dhe Paqësorin në Departamentet e Çështjeve Politike dhe të Ndërtimit të Paqes dhe Operacioneve të Paqes. Më parë, ai ishte Drejtor për Azinë, Lindjen e Mesme, Evropën dhe Amerikën Latine në Departamentin e Operacioneve Paqeruajtëse (2015-2019). Z. Due shërbeu gjithashtu si Përfaqësues i Sekretarit të Përgjithshëm dhe Shef i Zyrës së Kombeve të Bashkuara në Beograd (2013-2015), dhe ishte Zyrtar i Çështjeve Politike me UNMIK-un në Prishtinë. Në Nju Jork, pozicionet e tij kanë përfshirë gjithashtu Shef Zyre/Asistent Special i Nënsekretarit të Përgjithshëm për Operacionet Paqeruajtëse (2009-2013), Udhëheqës Ekipi për Afrikën Perëndimore (2008-2009) dhe Udhëheqës Ekipi për Evropën dhe Amerikën Latine (2008)”, thuhet në njoftimin e UNMIK-ut për Due.

Sipas këtij njoftimi,  Z. Due shërbeu në Ministrinë e Punëve të Jashtme të Danimarkës, në Kopenhagen dhe në Eritrea.

“Z. Due ka një diplomë Bachelor dhe një diplomë Master në Filozofi, Politikë dhe Ekonomi nga Universiteti i Oksfordit, Mbretëria e Bashkuar; një diplomë Master në Marrëdhënie Ndërkombëtare nga Instituti i Studimeve Ndërkombëtare në Gjenevë, Zvicër; dhe një diplomë Master në Shkenca Sociale dhe Filozofi nga Universiteti i Kopenhagenit, Danimarkë. Përveç gjuhës së tij amtare daneze, ai flet anglisht, frëngjisht dhe gjermanisht”, thuhet mes tjerash në njoftim. /Lajmi.net/ 

The UN Secretary-General has appointed Mr. Peter N. Due of Denmark as his new Special Representative and Head of the United Nations Interim Administration Mission in Kosovo | #UNMIK ⤵️https://t.co/YZdLSSG2VK pic.twitter.com/fKXOwhacCI

— UNMIK (UN Mission in Kosovo) (@UNMIKosovo) November 13, 2025