Përveç Listës Serbe, nuk certifikohet as Partia Demokratike Serbe. “Komisioni Qendror i Zgjedhjeve sot mori një vendim të turpshëm, të paligjshëm dhe politikisht të motivuar, me të cilin i ndalohet pjesëmarrja Partisë Demokratike Serbe në zgjedhjet lokale të ardhshme në Kosovë”, u deklarua mbrëmë nga kjo parti.
Ata kanë pretenduar se disa anëtarë të KQZ-së gjatë debatit “tentuan të diskreditojnë Partinë Demokratike Serbe duke u thirrur në procedura ndaj kryetarit të partisë, Aleksandar Arsenijeviq”, pavarësisht faktit se, siç pretendojnë ata, “në vetë arsyetimin e vendimit pranohet qartë se nuk ka ekzistuar asnjë pengesë juridike për verifikimin e partisë sonë, si dhe se Zyra për verifikimin e kandidaturave ka dhënë rekomandim pozitiv.”
“Duam të theksojmë se kurthi ndaj kryetarit tonë nuk është i rastësishëm. Ai është pjesë e një fushate më të gjerë politike, e cila ka për qëllim të heshtë dhe eliminojë të vetmen forcë autentike opozitare të serbëve në Kosovë – Demokracinë Serbe. Kjo fushatë e orkestruar ka për detyrë të dekurajojë popullatën serbe dhe t’ia mohojë të drejtën për zgjedhje të lira”, u deklarua nga kjo parti.
Demokracia Serbe ka paralajmëruar se do të shfrytëzojë të gjitha mjetet juridike, përfshirë ankesën në Panelin Zgjedhor për Ankesa dhe Parashtresa, si dhe mekanizmat pranë institucioneve vendore dhe ndërkombëtare.
Ata i kanë bërë thirrje bashkësisë ndërkombëtare “që të mbajë një qëndrim të qartë” ndaj këtyre “proceseve politikisht të montuara, sepse heshtja nënkupton bashkëpjesëmarrje në shuarjen e demokracisë dhe të lirisë”.
