Komuna e Fushë Kosovës ka nisur sot një aksion për lirimin e hapësirave publike, duke i rrënuar objektet që janë ndërtuar pa leje.
Lajmin e ka konfirmuar drejtori i Inspektoratit në këtë komunë, Donat Zharku.
Ai ka shtuar se aksioni ka filluar në rrugën “Hajrulla Zymi”, ndërsa në ditët në vijim do të vazhdojnë edhe me rrugët e tjera të qytetit.
“Qëllimi i këtij veprimi është kthimi i hapësirave publike për qytetarët dhe respektimi i rregullave komunale. Ky aksion do të përfshijë të gjithë territorin e qytetit të Fushë Kosovës dhe do të zhvillohet me mbështetjen e institucioneve relevante deri në përfundimin e tij të plotë”, tha Zharku.
Ndërkaq më 15 maj, Komuna e Fushë Kosovës kishte lëshuar një urdhëresë për lirimin e sipërfaqeve publike nga objektet e përkohshme në territorin e kësaj komune.
“Urdhërohen të gjithë personat fizik dhe juridik që brenda afatit prej 30 ditësh kalendarike nga dita e shpalljes së kësaj urdhërese në faqen zyrtare të Komunës t’i lirojnë sipërfaqet e cekura në pikën 1 të kësaj urdhërese”, thuhej në urdhëresë.
