Uebfaqja zyrtare e Ministrisë për Komunitete dhe Kthim është kthyer në një trampolinë për të kaluar tek një uebsajt paralel, në të cilin plasohen aktivitetet e ministrit Dalibor Jevtiq, shkruan sot Koha Ditore.
Dritarja që hapet ofron informacione në gjuhën serbe, të shkruara në cirilike.
Kësisoj, faqja zyrtare e internetit e kësaj ministrie, si informatë të fundit mban një urim të ministrit për Krishtlindje, i bërë më 5 janar. Prej atëherë, të gjitha informatat e tjera janë publikuar në sajtin paralel. I fundit është urimi i ministrit për Kurban Bajramin.
Sajti i krijuar pasi Jevtiqi është bërë ministër, ka në domen inicialet e versionit serbisht të emrit të Ministrisë për Komunitete dhe Kthim. Si mundësi të parë informimi ka gjuhën serbe në versionin cirilik. Ka për opsion edhe versionin latin të serbishtes.
Kjo dritare interneti, linku i së cilës nuk ndodhet i listuar në Portalin Shtetëror, mundësi dytësore informimi ka lënë gjuhën shqipe. Informacionet i përkthen edhe në anglisht.
