Deputeti Behgjet Pacolli dhe këshilltarja e kryeministrit në detyrë Albin Kurti, Furtuna Sheremeti, janë përplasur në Twitter rreth çështjes së ardhjes së Pacollit nga Zvicra. Pacolli thotë se Qeveria ka lejuar të tjerët të hyjnë në Kosovë pa u izoluar në konvikte, e Sheremeti thotë se pushteti s’është mbi ligjin.
Pasi Pacolli u ankua se autoritetet kosovare po e pengojnë të vijë në Kosovë dhe tha se madje i është anuluar edhe leja për të ateruar në Kosovë, Sheremeti tha se kjo qasje vjen për shkak se “është e vështirë të pranohet se të gjithë janë të barabartë para ligjit”.
“Kjo qasje eshte kriju si rezultat i sa e sa viteve praktike qe pushteti eshte mbi ligjin. Eshte veshtire me e pranu tash qe te gjithe realisht jemi te barabarte para ligjit”, ka shkruar Sheremeti në Twitter.
Ndërkaq, Pacolli e akuzoi këshilltaren e Kurtit se Qeveria po përdor standarde të dyfishta dhe se nuk i ka izoluar as punonjësit e UNMIK-ut, EULEX-it, e as shtetasit kosovarë të etnisë serbe.
“Stafi i Eulexit është përjashtuar nga rregullat me vendim të Ministrit Vitia. Edhe stafi i Unmikut poashtu. Qytetarët serbë të Kosovës janë përjashtuar nga ky rregull. Pyeta është pse po përdorën standarde të dyfishta dhe po bëhen pengesa për zgjedhjen e një deputet të zgjedhur? Së paku mos gënjeni z. Albin Kurti”, thuhet në komentin e Pacollit rreth postimit të këshilltares së kryeministrit.
Sheremeti e ka udhëzuar më pas Pacollin që ta shikojë njoftimin për media që e lëshoi më herët Ministria e Shëndetësisë.
