Presidentja Vjosa Osmani ka takuar sot kryeministrin e Eswatinit, Russell Mmiso Dlamini, gjatë Samitit Botëror të Qeverisjes ku ajo po merr pjesë.
Osmani ka falënderuar Dlaminin për “njohjen e hershme” të pavarësisë së Kosovës.
Për këtë shtet, presidenti i Serbisë, Aleksandar Vuçiq, para tri vitesh kishte pretenduar se e kishte hequr njohjen për pavarësinë e Kosovës, duke e listuar bashkë me tetë vende të tjera.
Por, Osmani tha se ka marrë gatishmëri nga lideri i këtij vendi për avancim të raporteve mes të dyja vendeve.
“Shpreha mirënjohjen e popullit të Kosovës për njohjen e hershme të pavarësisë nga Eswatini, si dhe gatishmërinë për të avancuar drejt lidhjes së marrëveshjeve në fusha konkrete me interes të dyanshëm. Po ashtu diskutuam për koordinim më të ngushtë në forume multilaterale. Kosova mbetet e përkushtuar ndaj partneriteteve të ndërtuara mbi respekt dhe vizion të përbashkët për paqe dhe zhvillim”.
