Subjektet opozitare, Lëvizja Vetëvendosje, Aleanca për ardhmërinë e Kosovës dhe Nisma për Kosovën, do të marrin pjesë në seancën e paralajmëruar të Kuvendit të Kosovës, më 1 shtator, në të cilën, ratifikimi i Marrëveshjes për demarkacionin me Malin e Zi, do të hidhet në votim.
Përfaqësuesit e të tri subjekteve opozitare, thonë se do të votojnë kundër kësaj marrëveshjeje.
Ahmet Isufi, nënkryetar i Aleancës për Ardhmërinë e Kosovës, thekson që ky subjekt opozitar e kundërshton ratifikimin e Marrëveshjes për shënjimin e kufirit me Malin e Zi, por që nuk janë pjesë e organizimit të protestës.
“Normalisht, është e drejtë qytetare e kujtdo që të dalë në kundërshtim të kësaj marrëveshje”, thekson Isufi. Ndërkaq, Zafir Berisha, deputet i Nishmës për Kosovën, shton: “Ne i mbështesim protestat paqësore dhe lëvizjet qytetare. Natyrisht që qytetarët mund të marrin pjesë, por ftesa jonë për një protestë, pa qenë pjesë e organizimit, është pak si në dilemë”.
