Qeverisja, Fadil Nura, nuk po i fal qendrat tregtare në Skenderaj në lidhje me abuzimin dhe mashtrimin me çmime. Gjatë ditës së sotme është dënuar edhe një qender tregtare, pasi u gjet se tjetër çmim kishte në rafte e tjetër çmim tek arka. Për këtë mashtrim me çmime u dënua me 400 euro nga Komuna e Skenderajt, shkruan Drenica Press.
Në një komunikatë nga Komuna e Skenderajt thuhet se:”Drejtoria e Inspekcionit e Komunës së Skenderajt, i ka shqiptuar gjobë njërës nga qendrat e mëdha tregtare në qytet, pasi është gjetur se ka abuzuar me çmimin e një artikulli ushqimor.
Sipas konstatimit zyrar të kontrollit nga ana e inspektorëve, artikulli është reklamuar me tjetër çmim e me tjetër është shitur te arka.
Qytetari që është ballafaquar me këtë rast, ka denoncuar tek organet kompetente komunale, të cilat më pas kanë dal në vendin e ngjarjes dhe e kanë konstatuar mospërputhjen e çmimit.
Më pas, inspektorët i kanë shqiptuar gjobë, dhe e kanë obliguar menaxherin e qendrës të rregullojë çështjen e çmimeve, duke harmonizuar çmimin mes arkës dhe vitrinës së artikujve..
Komuna e Skenderajt shpreh falënderim ndaj qytetarëve, rreth bashkëpunimit, dhe fton secilin të paraqes çdo rast të abuzimit si me çmime, ashtu edhe me artikuj që hasin me afat të skaduar.
