Gjykata Themelore në Gjakovë ka caktuar masën një muaj paraburgim ndaj shtetasit nga Shqipëria G.B., nën dyshimet se ka kryer veprën penale blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge.
I pandehuri më 8 shtator 2025, rreth orës 17:55, në Ponoshec të Gjakovës, pa autorizim dhe me qëllim të shitjes, ka transportuar substanca apo preparate të cilat me ligj janë shpallur si narkotikë.
Patrulla e policisë kufitare Ponoshec, gjatë patrullimit ka ndalur veturën të cilin po e drejtonte i pandehuri.
Pas ndaljes se automjetit gjatë komunikimit me shoferin është ndier një aromë e dyshuar për narkotik, fillimisht është pyetur i pandehuri se a ka diçka ilegale në veturë, i njëjti është përgjigjur se jo, ndërsa gjatë kontrollit të automjetit nën asistimin edhe të zyrtarëve policor të Njësisë K9 kanë gjetur dy qese narkotik e llojit marihuanë në bagazh, në peshë 1 kilogram e 48 gramë dhe një qese e vogël e fshehur nën plastikën e fshesave të automjetit në peshë 1.77 gramë.
Sasia e narkotikëve, automjeti, 246 euro dhe 5 mijë lekë janë sekuestruar nga zyrtarët policorë.
Palët kanë të drejtën e ankesës ndaj këtij vendimi në Gjykatën e Apelit të Kosovës.
