Dy pjesëtarët e Policisë së Kosovës, Malsor Dashi dhe Armend Trena janë zhdukur që nga mbrëmja e së shtunës në rrugën Hani i Elezit-Kaçanik, ku pas një aksideni kishin rënë në lumin Lepenc.
Që atë natë kishin nisur kërkimet për gjetjen e tyre, por deri më tani nuk ka pasur asnjë rezultat.
Dje gjatë gjithë ditës, Policia e Kosovës, FSK-ja dhe zhytësit janë mobilizuar në vendin ku thuhet se trupat kishin rënë nga një lartësi prej 200 apo 300 metrash, por kërkimet ishin ndalur në orët e mbrëmjes për shkak të mungesës së ndriqimit, shkruan Periskopi.
Sidoqoftë është paralajmëruar se kërkimet do të nisin sot prej orës 09:00, ku përveç njësiteve përgjegjëse, është bërë ftesë nëpër rrjetet sociale që edhe qytetarët e thjeshtë të kontribuojnë në gjetjen e dy trupave.
Zëdhënësi i Policisë Rajonale të Ferizajt, Agim Gashi sot për Periskopin ka thënë se kërkimet do të vazhdojnë në rrjedhat e lumit Lepenc e deri tek kufiri me Maqedoninë.
‘Kërkimet vazhdojnë edhe sot. Kryesisht do të bëhen në rrjedhat e lumin Lepenc deri në kufi të Maqedonisë’, ka thënë Gashi për Periskopin.
Policia e Kosovës ka thënë se për shkaqe ende të panjohura, vetura në të cilën gjendeshin dy policët kishte humbur kontrollin dhe kishte dalë nga rruga. Vetura është nxjerrë nga lumi, por jo edhe dy policët.
Janë ngritur dyshimet se rrjedha e lumit Lepenc mund t’i ketë dërguar trupat drejt Maqedonisë, për çka ky shtet ka shprehur gatishmërinë të ndihmojë në gjetjen e policëve.
Në anën tjetër, kryeministri Ramush Haradinaj ka pasur një takim me ministrin e Brendshëm, Bejtush Gashin, UD e drejtorit të Policisë së Kosovës, Naim Rexha, nga të cilët ka marrë raportin për ecurinë e deritashme të kërkimeve, si dhe procedurat e mëtejme për këtë ngjarje. Ai ka paralajmëruar se do t’i telefonojë edhe homologut të tij maqedonas, Zoran Zaev për të vazhduar kërkimet edhe në anën e territorit të Maqedonisë, ndonëse kanë mbetur edhe dy kilometra për të vazhduar kërkimet brenda Kosovës./Periskopi/
