Dhjetëra njerëz kanë vdekur në shtetin verior të Nigerisë, Niger, pasi një varkë që transportonte rreth 100 persona u mbyt në një lumë.
Varka që thuhet se ishte e mbingarkuar pasi po transportonte pasagjerë, përfshirë fëmijë, u përmbys kur goditi një trung peme të zhytur pranë komunitetit Gausawa në Zonën e Qeverisjes Vendore Borgu.
Agjencia shtetërore e emergjencave tha se 29 persona kishin vdekur dhe më shumë se 50 të tjerë u shpëtuan, ndërsa operacionet e kërkimit vazhdojnë. Një zyrtar lokal i tha agjencisë së lajmeve Reuters se numri i të vdekurve ishte rritur në 60, shkruan BBC, transmeton IndeksOnline.
Incidenti thuhet se ndodhi rreth orës 11:30 të mëngjesit të së martës në lumin Malale, pasi varka ishte nisur nga Tungan Sule në distriktin Malale.
Kreu i distriktit i tha Reuters se kishte qenë në vendngjarje menjëherë pas aksidentit.
“Isha në vendngjarje dje rreth orës 12:00 deri në orën 16:00. Varka mbante më shumë se 100 persona. Ne arritëm të nxirrnim 31 kufoma nga lumi. Varka u nxor dhe u largua gjithashtu”, citoi Reuters Sa’adu Inuwa Muhammad.
Abdullahi Baba Ara, kreu i zonës Borgu, tha se numri i të vdekurve ishte “rritur në 60. Dhjetë persona janë gjetur në gjendje të rëndë dhe shumë të tjerë janë ende në kërkim”, raporton Reuters.
Aksidentet me anije janë mjaft të zakonshme në Nigeri, shpesh për shkak të mbingarkesës, rregulloreve të dobëta dhe masave të pamjaftueshme të sigurisë.
