Komuna e Vushtrrisë është njëra nga komunat më të prekura nga migrimi i qytetarëve të Kosovës, në drejtim të vendeve të Bashkimit Evropian (BE). Tashmë ky qytet është zbrazur pothuajse si asnjëherë më parë, e kjo vërehet edhe me mungesën e nxënësve në procesin mësimor.

Drejtori i Arsimit në komunën e Vushtrrisë, Musa Tërbunja, ka thënë për Telegrafin se sipas evidencave të cilat i ka ai, në këtë komunë, në procesin mësimor, mungojnë 406 nxënës, si pasojë e largimit të familjeve të tyre në drejtim të shteteve të BE-së.

“Mirëpo, mendoj se është mirë të sqarojmë se disa prej atyre që janë larguar, përsëri i janë kthyer procesit mësimor”, ka theksuar ai.

I pyetur për numrin e punëtorëve të komunës që janë larguar nga Kosova, Tërbunja ka sqaruar së janë pesë punëtor komunalë (teknikë- mirëmbajtës të shkollave) që kanë lëshuar punën.

“Ndërsa, nga stafi i komunës, me sa kemi informata, nuk kemi asnjë punëtor që është larguar nga Kosova”, ka shtuar Tërbunja.