Kryeministri izraelit Benjamin Netanyahu njoftoi sot sulme të mëtejshme të përbashkëta me SHBA-në ndaj infrastrukturës iraniane, në një video të publikuar nga zyra e tij gjatë një vlerësimi të situatës.
“Së bashku me miqtë tanë amerikanë, ne do të vazhdojmë të godasim regjimin terrorist në Iran. Ne po eliminojmë komandantët, po bombardojmë urat dhe infrastrukturën”, tha Netanyahu.
Deklarata e tij erdhi pasi ushtria amerikane bombardoi një urë kyçe në autostradë pranë Teheranit.
“Forcat ajrore të Izraelit kanë shkatërruar 70% të kapacitetit të prodhimit të çelikut të Iranit në ditët e fundit”, shtoi Netanyahu.
“Një fabrikë çeliku pranë Isfahanit ka ndaluar operacionet pas sulmeve të reja ajrore ndaj industrisë së çelikut të Iranit”, raportuan gazetat “Shargh” dhe “Ham-Mihan”.
“Ky është një sukses i madh që i privon Gardën Revolucionare si nga burimet financiare ashtu edhe nga aftësia për të prodhuar armë”, tha Netanyahu, duke iu referuar Trupave të Gardës Revolucionare Islamike.
Industria e çelikut është një nga sektorët kryesorë të Iranit dhe luan një rol qendror në prodhimin e automjeteve dhe sektorin e mbrojtjes.
Pas sulmit ndaj objektivave ushtarake, Izraeli dhe SHBA-ja tani po godasin edhe infrastrukturën civile iraniane dhe zonat industriale pas disa javësh lufte.
