Nënkryetari i Komunës së Skenderajt Fadil Nura ka pritur sot në takim Ministrin e Punës dhe Mirëqenjes Sociale Arban Abrashi. Temë e takimit ishte bashkëpunim në fushën e përmirësimit të jetës së qytetarëve dhe shpërndarja e 100 pakove me veshmbathje për 100 familje në nevojë të Komunës së Skenderajt.
Nënkryetari Nura e falenderoi ministrin Abrashi për vizitën dhe shpërndarjen e pakove ndihmë për familjet me asistencë sociale. Ai u shpreh i gatshëm për bashkëpunim në fushën e përmirësimit të jetës së familjeve me gjendje jo të mirë ekonomike.
Ministri Abrashi u shpreh i kënaqur me mundësinë që ka pasur Ministria për të ndihmuar familjen në nevojë, duke përmendur edhe institucionet e tjera të cilat kanë kontribuar në sigurimin e këtyre pakove që përmbajnë veshmbathje dhe shtrojë e mbulojë. Duke folur për bashkëpunimin ndër institucional, ministri Abrashi u shpreh i gatshëm për të bashkëpunuar me Komunën e Skenderajt në përmirësimit të jetës së qytetarëve, sidomos në fushën e strehimit të familjeve skamnore.
Në takimin e përbashkët morën pjesë edhe Kryetari i OVL të UÇK-së Hysni Gucati dhe përfaqsues të shoqatës “Nënë Tereza”
Nënkryetari Nura dhe Ministri Abrashi pas takimit kanë bërë shpërndarjen e pakove për familjet me asistencë sociale në Qendrën për Punë Sociale në Skenderaj. Përzgjedhja e 100 familjeve përfituese të këtyre ndihmave është bërë nga Ministria e Punës dhe Mirëqenies Sociale dhe Qendra për Punë Sociale në Skenderaj.
