Presidentja e Kosovës, Vjosa Osmani, ka zhvilluar të enjten një tjetër takim me të ngarkuarën me punë të Shteteve të Bashkuara të Amerikës në Kosovë, Anu Prattipati.
Sipas njoftimit nga Presidenca, gjatë takimit janë trajtuar zhvillimet aktuale në vend dhe tema të tjera me interes të përbashkët, transmeton lajmi.net.
“Gjatë takimit u diskutua për zhvillimet e fundit politike në vend, me theks të veçantë te rëndësia e përmbylljes së proceseve kushtetuese në përputhje të plotë me Kushtetutën”, thuhet në komunikatë.
Presidentja Osmani ka ritheksuar gjithashtu rëndësinë e marrëdhënieve me Shtetet e Bashkuara të Amerikës.
Sipas njoftimit, ajo ka theksuar se partneriteti me SHBA-në mbetet jetik për Kosovën.
“Presidentja Osmani gjithashtu ripotencoi se partneriteti me Shtetet e Bashkuara të Amerikës mbetet jetik dhe i pazëvendësueshëm për Republikën e Kosovës”, thuhet më tej në njoftim.
Ky është takimi i dytë gjatë ditës së sotme mes Osmanit dhe Prattipatit.
Komunikata e plotë:
Presidentja e Republikës së Kosovës, Vjosa Osmani, zhvilloi një takim me të ngarkuarën me punë të Shteteve të Bashkuara të Amerikës në Kosovë, znj. Anu Prattipati, gjatë të cilit u trajtuan zhvillimet aktuale në vend dhe tema të tjera me interes të përbashkët.
Gjatë takimit u diskutua për zhvillimet e fundit politike në vend, me theks të veçantë te rëndësia e përmbylljes së proceseve kushtetuese në përputhje të plotë me kushtetutën.
Presidentja Osmani gjithashtu ripotencoi se partneriteti me Shtetet e Bashkuara të Amerikës mbetet jetik dhe i pazëvendësueshëm për Republikën e Kosovës./lajmi.net/
