Lëvizja VETËVENDOSJE në Skenderaj ka dërguar një reagim në adresë të Drenicapress, lidhur me ankesat e banorëve të fshatit Syriganë.
Drenicapress e boton të plotë reagimin e Lëvizjes VETËVENDOSJE.
Reagim nga qëndra e Lëvizjes VETËVENDOSJE! në Skënderaj!
Sot, nga banorët e fshatit Syriganë jemi informuar për një zjarr të madh që i ka përfshirë malet e këtij fshati. Banorët e kishin kuptuar qëllimim e zjarrvënies: “Këtu duan ta ndërtojnë një gurëthyes.”- thonë ata.
“Siç duket fillimisht duan t’i shëmtojnë këto bukuri natyrore, e mandej të na thonë: e shihni që mali është djegur, bukuri natyrore s’ka më?! E pra, nuk keni pse të protestoni kur ne duam ta ndërtojmë gurëthyesin.” Ky është rrëfimi i banorëve.
Rrëfim të cilin ata e përligjin me faktin se kishin lajmëruar policinë dhe zjarrëfikësit, por qe ata qëllimisht ishin vonuar, derisa përmasat e zjarrit të ishin të pa përballushme.
Ne si Lëvizje VETËVENDOSJE!, duam t’i sigurojmë banorët e Syriganës, por jo vetëm ata, se do na kenë çdo herë pranë në kërkesat e tyre të drejta. Ne do t’i përcjellim më shumë vëmendje zhvillimet atje, dhe do të angazhohemi që ai gurëthyes të mos ndërtohet pa pelqimin e banorëve. Njëkohësisht, kërkojmë nga pushteti lokal, të marr masa dhe të parandalojë zjarrin që po i rrezikon banorët, ngase banorët e Skenderajt kanë filluar t’i kuptojnë manipulimet që po u bëhen tash e 18 vite, dhe nuk do të jetë e largët dita kur duhet të japin llogari për dëmet që ia kanë shkaktuar dhe po vazhdojnë të ia shkaktojnë banorëve të Skënderajt dhe fshatërave përreth”, përfundon reagimi i Lëvizjes Vetëvendosje në Skenderaj.
