Ndërhyrje e rrallë në QKUK, hiqet tumor 27 centimetra nga kraharori i 23-vjeçarit
Një tumor gjigant, me peshë rreth 3.5 kilogramë dhe përmasa prej afërsisht 27 centimetra në gjatësi e 17 centimetra në gjerësi, është hequr me sukses nga kaviteti torakal i një pacienti 23-vjeçar në Klinikën e Kirurgjisë Torakale të QKUK-së.
Sipas njoftimit të Shërbimit Spitalor Klinik dhe Universitar të Kosovës (SHSKUK), bëhet fjalë për një ndërhyrje të rrallë dhe jashtëzakonisht komplekse, e cila ka paraqitur sfidë të veçantë për ekipin kirurgjik për shkak të përmasave të tumorit, lokalizimit dhe kompleksitetit të operacionit.
Ndërhyrja është realizuar nga ekipi i specializuar i Klinikës së Kirurgjisë Torakale, nën udhëheqjen e drejtorit të klinikës, Dr. Nazmi Kolgeci.
Në operacion ka marrë pjesë edhe ekipi i anestezionit, i udhëhequr nga anesteziologu Dr. Qendrim Morina, së bashku me instrumentarë dhe infermierë.
SHSKUK e ka cilësuar ndërhyrjen si një dëshmi të kapaciteteve profesionale të stafit shëndetësor dhe të bashkëpunimit multidisiplinar në trajtimin e rasteve të ndërlikuara kirurgjikale.
Lexo edhe“Qe qysh funksionon ekonomia e tij”: Arifi kritikon Kurtin për marrëveshjen e thëngjillit me Maqedoninë e Veriut
“Ky sukses i radhës dëshmon edhe një herë përkushtimin e lartë, profesionalizmin dhe bashkëpunimin e shkëlqyer multidisiplinar të stafit të QKUK-së në trajtimin e suksesshëm të rasteve më të rënda dhe më komplekse kirurgjikale”, thuhet në njoftimin e SHSKUK-së.
Nga ky institucion kanë theksuar se puna ekipore, profesionalizmi dhe përkushtimi maksimal ndaj pacientit mbeten ndër shtyllat kryesore të suksesit në trajtimin e rasteve të tilla.
Ndërhyrja është përfunduar me sukses, ndërsa SHSKUK nuk ka dhënë detaje të tjera lidhur me gjendjen shëndetësore të 23-vjeçarit pas operacionit. /Lajmi.net/
